Bloomberg: Trump kërkon 1 miliard dollarë nga vendet që duan të qëndrojnë në Bordin e Paqes
E Diel 18 Janar 2026, 11:11
Dritare.net
Presidenti i Shteteve të Bashkuara, Donald Trump, ka propozuar krijimin e një organizate ndërkombëtare të re, të quajtur Bordi i Paqes, që synon të promovojë stabilitetin, të rivendosë qeverisje të ligjshme dhe të sigurojë paqe të qëndrueshme në zonat e konfliktit dhe të kërcënuara prej tij.
Sipas një draft‑statuti të publikuar nga Bloomberg, vendet që duan të kenë një vend të përhershëm në Bordin e Paqes mund të kontribuojnë 1 miliard dollarë brenda vitit të parë të hyrjes në fuqi të statutit. Ky kontribut do t’u mundësojë vendeve të qëndrojnë në organizatë pa kufizimin standard trevjeçar të mandatit të anëtarëve.
Megjithatë, Shtëpia e Bardhë ka thënë se kjo nuk është një tarifë zyrtare, duke e konsideruar një opsion për të siguruar vend të përhershëm për partnerët që tregojnë angazhim të thellë ndaj paqes dhe sigurisë, jo një kusht i detyrueshëm për anëtarësim.
Bordi i Paqes është menduar si një strukturë mbikëqyrëse ndërkombëtare dhe njëkohësisht si administratë tranzitore për koordinimin e veprimeve diplomatike dhe politike në vendet me konflikte, duke synuar të ndërtojë një rend global më të qëndrueshëm.
Në kuadër të kësaj nisme, Trump ka përfshirë edhe Shqipërinë, duke ftuar vendin të bëhet shtet anëtar themelues i Bordit. Kjo ftesë u publikua edhe nga Kryeministri Edi Rama, i cili e konsideron një hap të rëndësishëm në rritjen ndërkombëtare të rolit të Shqipërisë./K.C/dritare.net
