Blegtorët protestë para Ministrisë së Bujqësisë, kërkojnë rishikim të skemës 2026
E Martë 7 Prill 2026, 11:11
Dritare.net
Anëtarë të Shoqatës “Blegtorët Prodhues të Qumështit” janë mbledhur këtë të martë në protestë përpara Ministrisë së Bujqësisë, kundër skemës kombëtare të mbështetjes për vitin 2026.
Gjatë tubimit, ata kanë shfaqur pankarta me thirrje si “Stop importit të qumështit”, “Formalizoni tregun e bulmetit” dhe “Bojkotoni firmat serbe”.
Ministri i Bujqësisë, Andis Salla, ka mbërritur në ambientet e ministrisë dhe u ka kërkuar protestuesve të zgjedhin një përfaqësi prej 10 personash për të zhvilluar një takim.
Blegtorët kundërshtojnë skemën aktuale, duke deklaruar se ajo nuk i mbështet dhe se kostot e prodhimit janë rritur ndjeshëm. Ata kërkojnë subvencionim të naftës, rritje të mbështetjes financiare për sektorin, si dhe masa për të kufizuar importet që, sipas tyre, krijojnë konkurrencë të padrejtë.
Një nga kërkesat kryesore mbetet rritja e subvencioneve, për të cilat ata thonë se janë disa herë më të ulëta krahasuar me vendet e rajonit.
Gjithashtu, fermerët kërkojnë naftë pa taksa ose lehtësim të taksës së qarkullimit, si dhe ngritjen e një laboratori për sigurinë e produkteve.
Sipas tyre, sektori po përballet me vështirësi për shkak të rritjes së çmimit të karburantit, kostove të ushqimit për bagëtitë dhe shpenzimeve të tjera bazë. Ata përmendin gjithashtu informalitetin në treg dhe nivelin e TVSH-së si faktorë që ndikojnë negativisht në aktivitetin e tyre.
Fermerët kërkojnë edhe krijimin e një bordi për produktet e shportës, duke argumentuar se në kushtet aktuale nuk arrijnë të konkurrojnë me fermerët e rajonit dhe të Bashkimit Evropian.
Protestuesit janë në pritje të zhvillimit të një takimi me ministrin e Bujqësisë dhe ministren e Financave. Ata paralajmërojnë se nëse kërkesat e tyre nuk merren parasysh, do të përshkallëzojnë protestën, duke përfshirë bllokimin e rrugëve me mjete bujqësore./L.F-dritare.net
