Berati, Vlora, Tirana dhe Shkodra festojnë Nëntorin me art, zeje dhe energjinë e nxënësve!
E Diel 30 Nëntor 2025, 13:01
Dritare.net
Festimet e Nëntorit këtë vit u shndërruan në një mozaik të gjallë artesh, traditash dhe aktivitetesh kreative në disa prej qyteteve kryesore të vendit. Ministrja e Arsimit dhe Sportit, Mirela Kumbaro ka ndarë momente nga Berati, Vlora, Tirana dhe Shkodra, ku nxënësit dhe mësuesit sollën në skenë energjinë dhe talentin e tyre.
Berat – Qyteti i një mbi një dritareve feston me art dhe traditë
Berati ishte një nga ndalesat e para ku Ministrja Kumbaro vlerësoi atmosferën e krijuar nga nxënësit e qytetit.
“Berati i një mbi një dritareve e festoi Nëntorin ashtu siç di më mirë: me art, zëra të rinj dhe me jehonën e traditës. Nxënësit e shkollave të Beratit sollën performanca plot dashuri për kulturën tonë, duke e kthyer trashëgiminë në krijimtari të re përmes programit ‘Art dhe Zeje’", shkruan Kumbaro.
Vlora – Qyteti i flamurit nuk mungon në festë
Edhe Vlora u bë pjesë e aktiviteteve mbarëkombëtare që shënojnë muajin e flamurit. Sipas Ministres Kumbaro, pjesëmarrja e nxënësve ishte e jashtëzakonshme.
Fëmijët sollën performanca artistike, punime artizanale dhe aktivitete muzikore që nderonin historinë e qytetit dhe simbolet kombëtare.
Tirana – 17 shkolla ndezin skenën e TOB-it
Në Teatrin e Operas dhe Baletit, 17 shkolla të Tiranës u bashkuan në një aktivitet të madh kulturor. Skena u mbush me muzikë klasike, valle, punime artistike dhe performanca të larmishme nga më të rinjtë e kryeqytetit. Ky aktivitet u cilësua si një shembull inspirues i integrimit të artit në arsimin parauniversitar.
Shkodra – Kori që këndon me shpirtin e kombit
Në Shkodër, në gjimnazin “28 Nëntori”, nxënësit krijuan një kor të posaçëm për festat e Nëntorit.
Performanca e tyre emocionoi publikun dhe solli një atmosferë të thellë reflektimi për rrënjët dhe identitetin kulturor shqiptar./dritare.net
