Bardhi e akuzoi në Kuvend, reagon drejtori i policisë Shkodër!
E Enjte 12 Shtator 2024, 16:04
Dritare.net
Drejtori i Policisë së Shkodrës, Edmond Sulaj ka reaguar pas akuzave nga opozita si të përfshirë në bisedat Sky EÇ dhe se është emëruar në detyrë nga eksponentë kriminalë.
Në reagimin zyrtar, Sulaj paralajmëron se do të kallëzojë penalisht Gazment Bardhin për akuza të rreme.
“Lidhur me disa deklarime të bëra nga një përfaqësues i një subjekti politik në seancën plenare të datës 12.09.2024 të Kuvendit të Republikës së Shqipërisë për disa insinuata për emërimin tim Drejtor të Drejtorisë Vendore të Policisë Shkodër, unë ndiej përgjegjësinë morale dhe profesionale të sqaroj opinion publik se këto deklarata të bëra sot, janë shpifje, të pabazuara dhe synojnë që të cenojnë figurën time në këtë proces të rëndësishëm të hapjes së konkurseve për pozicionet drejtuese në Policinë e Shtetit.
Sqaroj opinionin publik se unë Drejtuesi i Parë Edmond Reis SULAJ, jam emëruar në këtë pozicion sipas Urdhrit të Drejtorit të Përgjithshëm të Policisë së Shtetit nr. 6108, datë 11.10.2023. Sqarohet qartësisht se emërimi im, është kryer rreth 3 vite më vonë se periudha kohore së cilës i referohet deklaruesi.
Në vijim, informoj se do të procedoj me hapat ligjorë që parashikon ligji në fuqi, përfshirë edhe depozitimin e një kallëzimi penal”, shprehet Sulaj./M.K-dritare.net
