Nëntori nis me shi dhe ulje temperaturash, rikthehet dëbora
Sunday 1 November 2026, 09:09
Dritare.net
Muaji nëntor nis me mot të paqëndrueshëm në Shqipëri. Këtë të diel pjesa më e madhe e vendit do të përfshihet nga vranësirat dhe reshjet e shiut, ndërsa në zonat malore pritet edhe dëborë.
Sipas Shërbimit Meteorologjik Ushtarak, gjatë ditës parashikohen vranësira mesatare deri të dendura, të shoqëruara herë pas here me intervale kthjellimesh.
Reshjet e shiut do të jenë kryesisht me intensitet të ulët, por në momente të caktuara mund të shfaqen në formën e shtrëngatave afatshkurtra, të shoqëruara me shkarkesa elektrike.
Në zonat malore mbi 1100–1200 metra lartësi, kryesisht në veri, verilindje, lindje dhe juglindje, parashikohen reshje të dobëta dëbore.
Temperaturat e ajrit do të luhaten nga 5 gradë Celsius në zonat më të ftohta deri në 19 gradë Celsius në zonat më të ngrohta të vendit.
Era do të fryjë nga verilindja dhe juglindja me shpejtësi mesatare 4 metra në sekondë, ndërsa përgjatë bregdetit dhe në zonat luginore mund të arrijë deri në 12 metra në sekondë.
Në det parashikohet valëzim i forcës 1–2 ballë./dritare.net
