Nën presion për t’u larguar, Infantino merr vendimin. Do të rikandidojë për president të FIFA-s
Sunday 6 September 2026, 15:03
Dritare.net
Gianni Infantino nuk ka ndërmend të largohet nga drejtimi i FIFA-s. Pavarësisht presioneve dhe kritikave të forta të javëve të fundit, presidenti aktual i qeverisë botërore të futbollit ka konfirmuar se do të kandidojë sërish për një mandat të ri në zgjedhjet e marsit 2027.
FIFA konfirmoi zyrtarisht vendimin, pasi Infantino shmangu pyetjet e gazetarëve të Sky Sports mbi të ardhmen e tij në krye të institucionit.
“Presidenti i FIFA-s njoftoi se do të kandidonte për t’u rizgjedhur në vitin 2027. Sigurisht, asgjë nuk ka ndryshuar. Zoti Infantino do të kandidojë për t’u rizgjedhur”, deklaroi një zëdhënës i FIFA-s.
Infantino e kishte bërë publik për herë të parë vendimin e tij më 1 maj, gjatë Kongresit të 76-të të FIFA-s në Vankuver, kur u tha përfaqësuesve të 211 federatave anëtare se do të ishte kandidat edhe në zgjedhjet e ardhshme.
Por rikandidimi vjen në një moment veçanërisht të vështirë për presidentin e FIFA-s. Ai është përballur me thirrje për dorëheqje pas debatit të fortë që shkaktoi plani për t’u shitur investitorëve privatë pjesë të interesave komerciale të turneve të FIFA-s, një nismë që më pas u tërhoq.
Përplasjet me UEFA-n dhe disa federata europiane janë thelluar gjatë muajve të fundit. Federata Italiane e Futbollit, FIGC, njoftoi më 26 gusht se tërhiqte mbështetjen për kandidaturën e Infantinos në zgjedhjet e vitit 2027.
Megjithatë, kreu i FIFA-s vazhdon të ketë mbështetje të rëndësishme nga federata të tjera. Konfederata Afrikane e Futbollit, CAF, ka njoftuar më herët se federatat e saj anëtare mbështesin unanimisht Infantinon për mandatin 2027-2031.
Zgjedhjet për presidentin e FIFA-s do të zhvillohen gjatë Kongresit të FIFA-s në Marok, në mars 2027. Kandidatët që synojnë ta sfidojnë Infantinon duhet të shpallin kandidaturën e tyre deri më 18 nëntor.
Infantino ndodhet në krye të FIFA-s që prej vitit 2016./K.C/dritare.net
