Mbappe i prin garës, Messi ka shansin e fundit për “Këpucën e Artë”
Sunday 19 July 2026, 10:10
Dritare.net
Gara për “Këpucën e Artë” në Kupën e Botës 2026 po shkon drejt një finaleje historike, me trofeun që do të vendoset në ndeshjen e fundit të turneut.
Kylian Mbappe është aktualisht lideri i renditjes së golashënuesve, pasi dy golat e shënuar në humbjen spektakolare 6-4 të Francës ndaj Anglisë në ndeshjen për vendin e tretë e çuan në kuotën e 10 golave.
Sulmuesi francez ka dy gola avantazh ndaj Lionel Messit, por argjentinasi 39-vjeçar ka ende një ndeshje për të luajtur, finalen e madhe ndaj Spanjës. Nëse Messi arrin të shënojë dy herë në këtë takim, ai do të marrë “Këpucën e Artë”, falë numrit më të madh të asistimeve.
Nëse Messi nuk arrin këtë objektiv, Mbappe do të bëhet lojtari i parë në histori që fiton dy herë çmimin e golashënuesit më të mirë të një Botërori.
Përveç duelit për “Këpucën e Artë”, dy yjet po garojnë edhe për një tjetër rekord madhor: atë të golashënuesit më të mirë të të gjitha kohërave në Kupën e Botës. Mbappe kryeson aktualisht me 22 gola, ndërsa Messi ndodhet vetëm një gol pas tij.
Me 10 gola në këtë Botëror, Mbappe ka regjistruar numrin më të lartë të golave në një edicion të Kupës së Botës në këtë shekull. Lojtari i fundit që kishte arritur shifrën dyshifrore në një Botëror ishte legjenda gjermane Gerd Muller, me Gjermaninë Perëndimore në vitin 1970.
Para këtij turneu, vetëm tetë futbollistë kishin shënuar të paktën tetë gola në një edicion të vetëm të Kupës së Botës: Gerd Muller, Just Fontaine, Sandor Kocsis, Ademir, Eusebio, Guillermo Stabile, Ronaldo dhe vetë Mbappe.
Botërori 2026 ka qenë gjithashtu një skenë e madhe për yjet e rinj. Jude Bellingham i Anglisë, me golin ndaj Francës, është ngjitur në vendin e tretë të renditjes së golashënuesve me 7 gola, duke vendosur edhe një rekord të ri për një futbollist anglez në një Kupë Bote.
Bellingham ka kaluar Erling Haaland falë numrit më të madh të asistimeve, ndërsa kapiteni i Anglisë, Harry Kane, ndodhet një gol pas tij, së bashku me francezin Ousmane Dembele./dritare.net
