Krahasoj veten me të tjerët, mendoj se jam e paaftë! Psikologia këshillon të renë!
E Hënë 19 Gusht 2024, 11:11
Dritare.net
Përshëndetje psikologe Enertila
Unë që ju drejtohem jam një vajzë 27 vjeç që po përballem me vështirësi me veten time. Unë krahasohem shpesh me të tjerët dhe mendoj se gjithmonë ata janë më të zotët dhe më ta aftë se unë. Është një ndjenjë e herë pas hershme që më shkatëron dhe demoralizon komplet. Si ta kuptoj apo të bëj dicka për ta ndryshuar ju lutem. Faleminderit!
Psikologe Enertila Bekteshi përgjigjet!
Përshëndetje lexues të Dritare.net
Krahasimi i vetes me të tjerët do të thotë të mendosh se ata kanë karakteristika jashtëzakonisht pozitive dhe të injorosh aspektet negative të tyre. Është një sjellje në të cilën ne ekzagjerojmë të gjitha cilësitë pozitive të një personi dhe madje e konsiderojmë atë të përsosur. Duke u krahasuar me dikë, priremi të ulim veten në krahasim me personin që krahasohemi. Është e zakonshme të gjejmë veten në situata ku vendosim dikë më lartë, por kjo mund të jetë e dëmshme si për ne ashtu edhe për marrëdhëniet tona.
Duke injoruar aspektet negative të një personi, mund të kemi pritshmëri jorealiste dhe të ndihemi të zhgënjyer kur ato pritshmëri nuk përmbushen. Duke zhvlerësuar veten në krahasim me të tjerët, mund të ulim vetëvlerësimin tonë dhe rrisim ndjenjën e inferjoritetit.Vendosja e vetes krahasimisht me të tjerët mund të vi nga vetëvlersimi i ulët.
Ndonjëherë mund të mendojmë se të tjerët janë më të mirë se ne sepse nuk kemi një perceptim të mirë për veten. Kur e nënçmojmë veten, priremi të ekzagjerojmë karakteristikat pozitive të të tjerëve, veçanërisht ato cilësi që mendojmë se na mungojnë. Në ditët e sotme, ne vazhdimisht jemi të ekspozuar ndaj imazheve dhe historive që i prezantojnë njerëzit në mënyrën më të përsosur të mundshme. Rrjetet sociale gjithashtu mund të nxisin se të tjerët janë më mirë se ne dhe, mbi të gjitha, të na inkurajojnë të krahasohemi.
Për të ndaluar mendimet se të tjerët janë më mirë se ne dhe për të shmangur efektet negative në vetëvlerësimin dhe marrëdhëniet tona, në këndvështrimin tim është e rëndësishme e dashur lexuesja jonë të jini të vetëdijshëm. Kushtojini vëmendje veprimeve, fjalëve dhe mendimeve tuaja, veçanërisht kur jeni përreth ose kur mendoni për personin që e mendoni më të mirë se vetja juaj. Jini më të vetëdijshëm dhe të pranishëm në këtë moment.
E dashur lexuesja jonë një nga arsyet kryesore që ne mendojmë se të tjerët janë më mirë sesa ne është shmangia dhe përballja me dobësitë tona. Diheni e dashur se askush nuk është i përsosur. Duke pranuar papërsosmërinë tuaj, do të jeni më të hapur për të krijuar lidhje reale. Kur krahasohemi me dikë, shpesh priremi t'i kënaqim ata. Mediat sociale mund të rrisin tendencën tonë për të idealizuar të tjerët duke treguar versione të kuruara dhe të filtruara të jetës së tyre. Për të shmangur këtë, merrni parasysh zvogëlimin e kohës që shpenzoni në mediat sociale ose mos ndiqni ata njerëz që shkaktojnë ndjenja zilie ose idealizimi.
Kufizoni ekspozimin ndaj mediave sociale.Në këndvështrimin tim do tu sugjeroja të përqendroheni në rritjen tuaj personale. Në vend që të përqendroni vëmendjen tuaj tek personat që krahasoheni, përqendrohuni te vetja dhe rritja juaj personale. Drejtojeni energjinë tuaj drejt zhvillimit tuaj dhe krijimit të jetës që dëshironi.
Shpresoj shumë që këndvështrimi im tu mdihmojë në situatën tuaj. Gjithë të mirat!/ dritare.net
