E reja i shkruan psikologes: Më ndihmo të pranoj veten!
E Hënë 30 Shtator 2024, 11:11
Dritare.net
Përshëndetje Psikologe Enertila
Unë që ju shkruaj jam një vajzë e cila po vuaj nga gjykimet për veten. Kam filluar të mendoj keq për veten time dhe ajo që kërkoj nga ju nëse mund të më ndihmoni është të më sugjeroni se si të pranoj veten time. Kam nevojë të pranoj veten time. Ju falënderoj!
Psikologe Enertila Bekteshi, përgjigjet!
Përshëndetje lexues të Dritare.net
Secili prej nesh ka pika të forta dhe të dobëta, ato janë pjesë e qenies sonë, personalitetit dhe identitetit tonë. Njohja dhe pranimi i aspekteve pozitive të vetvetes është i lehtë dhe është brenda mundësive të të gjithëve . Megjithatë, pranimi i defekteve tona dhe dashuria për veten , pavarësisht nga aspektet negative që na takojnë, mund të bëhet një sfidë për shumë njerëz ose një shqetësim i vërtetë. Ka njerëz të cilët janë në gjendje të pranojnë të metat e tyre, ndërsa të tjerët i fiksojnë ato dhe bëhen kritikët e tyre më të këqij. Të pranosh veten do të thotë që të jesh i vetëdijshëm për pjesët që ndërtojnë qenien tënde, pozitive dhe negative, dhe të jesh i lumtur me atë që je.
Të pranosh veten do të thotë të pranoni vlerat , preferencat, burimet dhe ndjenjat, intuitat dhe veprimet si nga e kaluara ashtu edhe nga e tashmja.Të pranosh veten do të thotë të njohim dobësitë pa fajësuar veten me një qëndrim tepër negativ ndaj vetes, duhet një qëndrim pozitiv ndaj vetes pa ndjerë nevojën për miratim të vazhdueshëm nga të tjerët. Të pranosh veten do të thotë të jesh në gjendje ta duash veten dhe ta respektosh veten pavarësisht të metave. Asnjëri prej nesh nuk është i përsosur dhe të gjithë kemi diçka që do të donim të përmirësonim tek vetja, por të duash veten për atë që je mund të jetë e ndërlikuar.
Në këndvështrimin tim e dashur lexuesja jonë unë në lidhje me problemin që ju sillni do tu sugjeroja të identifikoni, artikuloni dhe përqafoni vlerat dhe besimet tuaja personale. Të menduarit dhe të vepruarit në përputhje me vlerat tuaja mund të ndihmojë në forcimin e ndjenjës tuaj të identitetit , përmirësimin e respektit për veten dhe lehtësimin e vetëpranimit.
E dashur lexuesja jonë do tu sugjeroja të vendosni kufij të shëndetshëm. Mund të zbuloni se keni nevojë për kufij në aspekte të ndryshme të jetës suaj, si puna, marrëdhëniet, koha dhe financat. Vendosni kufij dhe qëndroni në to. Mos lejoni që të tjerët të shkelin kufijtë tuaj ose t'i marrin ato si të mirëqenë. Kjo mund të ndihmojë në parandalimin e keqtrajtimit, i cili mund të jetë i vështirë për t'u pranuar në një nivel nënndërgjegjeshëm.
Lexuesja jonë nëse keni bërë një gabim, pranoni atë dhe mësoni prej tij . Mësoni të falni veten për gabimet tuaja. Pranoni se nuk jeni ju shkaku i çdo situate negative që hasni. Mundohuni të jeni objektiv dhe të vlerësoni faktorë të tjerë që mund të kenë luajtur një rol në rrethanat. Mundohuni të jeni një version më i mirë i vetes suaj të mëparshme, në vend që ta krahasoni veten me të tjerët. Përpiquni të shihni pozitiven në çdo situatë. Në vend që të përqendroheni në atë që keni bërë gabim, përpiquni të identifikoni të paktën një gjë që keni bërë mirë. Nëse keni një mendim negativ për veten tuaj, ndryshojeni dhe zëvendësojeni me një mendim pozitiv. Së fundi, vetë-pranimi mund t'ju ndihmojë të jeni të lumtur dhe të qetë dhe të çojë në një ndjenjë mirëqenieje. Nga ana tjetër, mungesa e vetë-pranimit dhe një pikëpamje negative për veten mund të shkaktojë vetëbesim të ulët dhe një rrezik më të madh të kushteve të tilla si depresioni dhe ankthi. Shpresoj shumë që këndvështrimi im t’ju ndihmojë në situatën tuaj. Gjithë të mirat./dritare.net
