Receta e Arbanës hap pas hapi, për të gatuar gjelin me përshesh, që të habisësh këdo!
E Enjte 31 Dhjetor 2020, 11:11
Dritare.net
Ka disa lloje për të gatuar gjelin e detit me përshesh, tradicionalja për festën e Vitit të Ri. Zona të ndryshme, kanë mënyra të ndryshme. Arbana Osmani, që gjithë vitin e sidomos në karantinë, na ka treguar receta nga më të ndryshme, këtë herë ka treguar se si e gatuan ajo gjelin e detit. Pak po e sigurt, që me këtë recetë pjata kryesore e natës së sotme, do të jetë fantastike.
Për kulaçin:
1 kg miell
500 gramë kos
Gjysmë luge çaji sodë buke
Gjysmë luge gjelle kripë
Ujë
Përgatitja:
Vëmë brumin që duhet të jetë i fortë dhe e shtrijmë në një tavë të lyer me vaj ulliri. E pjekim në 200 gradë, për 30-35 minuta. Pasi të piqet e thërrmojmë me duar sa është i nxehtë. Mos e lini të ftohet, sepse është e vështirë të thërrmohet.
Për lëngun e kulaçit:
Kaurdisni një qepë të kuqe të grirë imët në 100 gramë gjalpë në temperaturë të ulët. Shtoni aty të brendshmet e gjelit, të prera në copa të vogla dhe skuqini bashkë me qepën. Hidhni kripë, piper, rigon dhe plot nenexhik të thatë. Shtoni lëngun që ka lëshuar gjeli gjazë pjekjes dhe 2 gota ujë. Ziejini për 15 minuta në temperaturë mesatare. Kulaçin e thërrmuar vendoseni në një tenxhere të madhe, hidhini lëngun e nxehtë dhe përziejini fort me lugë druri për disa minuta.
Për gjelin:
Pasi ta lyeni mirë e mirë me kripë dhe gjalpë, mbusheni me molle, karota, limon, qepë dhe selino.
Gjelin do ta piqni me gjoksin poshtë në këtë mënyrë:
30 minuta me 200 gradë
75 minuta me 160 gradë
75 minuta 120 gradë
5 minuta 250 gradë
Mos e hapni furrën orë e minutë dhe as mos e shpini gjelin gjatë gjithë kohës. Arbana thotë se nëse veproni në këtë mënyrë nuk ka asnjë mundësi që gjeli të jetë i papjekur./L.F-dritare.net
