Receta/ Dhurata Thanasi sjell biskotat xhenoveze me livandë
E Diel 2 Gusht 2020, 20:08
Dritare.net
Dhurata Thanasi e Lugës së Argjendtë ka botuar një recetë biskotash, me livandë. Kjo recetë nuk është dosido, por kështu i bënin xhenovezët e moçëm.
Më poshtë receta e biskotës me livandë nga Luga e Argjendtë!
“Këto janë biskota që i ka bërë ime më, ime gjyshe e ndoshta dhe stërgjyshja! Nuk di të them kush më tej, por xhenovezët e moçëm i bënin kështu!” I mora me pak drojë dhe mosbesimin e dikujt që livandon e kishte veçse quajtur parfum për aromë. Sapo e shijova në gojë, aroma e livandës shpërtheu duke shkrirë masën e butë të brumit të pjekur në gjalpë dhe sheqerit me pak kripë, ashtu siç dallgët e buta të detit shpërbënin kalatë e rërës së fëmijërisë sonë. Ishin biskotat e para prej livandoje që provoja në fillim verën e vitit 2000, kur për herë të parë takova my mother-in-love.
Përbërës:
• 700 gr miell
• 350 gr gjalpë i rrahur (jo i freskët! Pra pa ujë!!!)
• lëkura e grimcuar e një kokërr limoni
• 350 gr sheqer i bardhë
• 1 grusht lule livando (kokrra vjollcë)
• 2 kokrra vezë të mëdha
• 1lugë kafe kripë e ashpër
• 2 lugë çaji pluhur pjekës
Përgatitja:
• Në një grirës bashkoni vezët me gjalpin e prerë në kubikë të vegjël, sheqerin, livandon dhe grihini derisa të formohet një krem i hollë
• Sitni miellin dhe pluhurin pjekës
• Shtoni kripën, lëkurt e limonit dhe kremin e gjalpit e përgatitur më parë
• Formoni brumin dhe lereni për 10 minuta në frigorifer
• Me ndihmën e një petësi hapni një petë me trashësi 50 ml dhe priteni me forma sipas dëshirës
• Shtroni një letër kuzhine mbi tavën e biskotave dhe vendosini këto të fundit në furrë të parangrohur për 10-12 minuta në temperaturën 160 gr C.
Shoqëroheni me një verë Shaketra xhenoveze nën tingujt e “Se stasera sono qui” kënduar nga Luigi Tenco.”
