Jeni në mëdyshje se çfarë të gatuani sot për darkë? Dritare.net ka një sugjerim për ju. Muffins me djathë grongozola, arra dhe dardha. Po, po me djathë, pasi muffins nuk janë vetëm të ëmbël, por dhe të kripur.
Nertila e “Artit të gatimit” gatoi posaçërisht për ndjekësit e dritare.net këtë recetë kaq të shijshme.
Është një kombinim në shije, nga ato që rrallë provoni, kombinim i të kripurës me të ëmblën.
Ja receta!
Përbërësit
250 gram miell
200 gram djathë grongozola ose djathë tjetër i butë
2 dardha
60 gram djathë parmixhano i grirë
100 gram arra
2 vezë
200 ml qumësht
60 gram gjalpë
Kripë
Përgatitja:
Fillimisht shkrini gjalpin. Pasi ta shkrini lëreni të ftohet. Në një enë hidhni miellin, shtoni në të djathin parmixhano, arrat, të cilat duhet t’i shtypni pak me dorë dhe pak maja për fryrje. Pastaj shtoni dhe dardhat e prera në copa të vogla, djathin grongozola dhe kripën. Në një enë tjetër përzini bashkë përbërësit e lëngshëm. Fillojeni me rrahjen e vezëve. Te vezët shtoni ngadalë edhe qumështin. Pastaj shtoni gjalpin e ftohur dhe përziejeni. Masën e lëngshme shtojeni tek ena me përbërësit e thatë, pak nga pak, ndërsa e përzini. Pasi të jetë krijuar një masë homogjene, do të jetë gati për ta hedhur në tavën për muffins. Vendosni letrat e kuzhinës, e nëse nuk keni, mund ta lyeni enën me vaj ose gjalpë që të mos ngjisë.
Kur ta keni gati tavën shtoni me lugë edhe përbërjen. Futeni të piqet për 20 minuta në 180 gradë. Pasi të jenë pjekur mirë, nxirrini nga tava dhe vendosini në pjatë.
Mund t’i shërbeni siç janë, për një aperitiv mes miqsh, ose mund t’i shoqëroni me një salcë me 4 djathërat. Ju bëfshin mirë!/dritare.net
