Studimi: Përdorimi i AI-së po na bën më pak inteligjentë
E Martë 17 Qershor 2025, 17:05
Dritare.net
Përdorimi i inteligjencës artificiale, veçanërisht i chatbot-eve si ChatGPT, mund të ndikojë negativisht në aftësitë e të menduarit kritik, memorjes dhe të shprehjes gjuhësore. Ky është përfundimi i një studimi të ri nga Instituti i Teknologjisë së Massachusetts-it (MIT), një prej universiteteve më të njohura në botë për kërkim shkencor dhe teknologji.
Sipas raportit, pjesëmarrësit që përdorën ChatGPT për të shkruar ese shfaqën aktivitet më të ulët cerebral krahasuar me ata që e përfunduan detyrën vetëm me fuqinë e mendjes së tyre. Jo vetëm kaq, por ata që u ndihmuan nga AI performuan më dobët edhe në testet e mëvonshme dhe hasën vështirësi kur u kërkua të kryenin detyra pa ndihmën e teknologjisë.
“Rezultatet tregojnë qartë se mbështetja e tepruar te inteligjenca artificiale mund të dëmtojë zhvillimin e aftësive bazë njohëse,” thuhet në përmbledhjen e studimit. “Kjo është veçanërisht shqetësuese për të rinjtë, të cilët janë më të ekspozuar ndaj përdorimit të AI-së në jetën e përditshme.”
Ekspertët theksojnë se, ndonëse AI mund të ndihmojë në përshpejtimin e proceseve të të shkruarit apo analizës, ajo nuk duhet të zëvendësojë plotësisht mendimin njerëzor. Studimi bën thirrje për përdorim më të vetëdijshëm dhe të balancuar të teknologjisë, në mënyrë që të ruhet zhvillimi natyral i trurit.
Ky hulumtim vjen në një kohë kur përdorimi i platformave si ChatGPT është bërë i zakonshëm në arsim, media dhe punë të përditshme, duke ngritur shqetësime për ndikimet afatgjata të teknologjisë në zhvillimin mendor të individëve./K.C/dritare.net
