Konsumoni shpesh multivitamina? Ja çfarë paralajmërojnë ekspertët!
E Hënë 23 Janar 2023, 16:04
Dritare.net
Ekspertët e shëndetësisë paralajmërojnë se duhet të bëjmë shumë kujdes në përdorimin e suplementeve ushqimore multivitamine edhe pse ato kanë një efekt pozitiv në uljen e ankthit, forcimin e imunitetit dhe rritjen e ndjenjës së energjisë.
Ato përfshijnë komponime të vitaminave dhe mineraleve të ndryshme që gjenden në kombinime që i përshtaten nevojave specifike të individit, si ato për imunitet më të mirë, përqendrim, efekt në oreks, rritje të energjisë etj.
Së fundmi më të përdorura kanë qenë ato me një përqindje të shtuar të vitaminave C dhe D dhe acideve të shëndetshme omega-3.
“Për shumicën e njerëzve, suplemente të tilla diete nuk janë aspak të nevojshme, sepse të gjitha vitaminat i marrin nga dieta e tyre. Ato rekomandohen për të moshuarit dhe njerëzit që kanë oreks të reduktuar, zakone të këqija të të ngrënit ose janë në një gjendje specifike mjekësore, si shërimi nga një sëmundje ose shtatzënia”, shprehet doktor Kelsey Lorenz.
Vitamina C është vërtetuar se forcon imunitetin dhe ndihmon në luftimin e ftohjes. Për imunitet më të fortë konsumohet edhe vitamina D sepse rregullon punën e mëlçisë dhe mungesa e saj shkakton inflamacione të ndryshme që mund të çojnë në sëmundje kronike. Përveç efekteve pozitive në imunitet, multivitaminat kanë një efekt pozitiv në gjendjen e përgjithshme mendore dhe fizike pasi krijojnë një ndjenjë vitaliteti.
Çështjet e shëndetit mendor janë bërë një temë e nxehtë vitet e fundit, me një numër në rritje të njerëzve që raportojnë probleme me ankthin dhe depresionin. Hulumtimet e fundit kanë vërtetuar se multivitamina, veçanërisht vitamina D, mund të ndihmojnë me këtë. Hulumtimet e fundit kanë vërtetuar se suplementet dietike multivitamine rritin kujtesën, vëmendjen, fokusin dhe aftësinë e planifikimit.
Megjithatë, duhet pasur kujdes me sasinë.
“Nëse konsumoni vitamina në doza të mëdha, doza për të cilat trupi juaj nuk ka nevojë, mund të përjetoni efekte anësore si të përziera apo probleme me tretjen. Në çdo rast, rekomandohet të merrni vetëm vitaminat që ju mungojnë dhe t’i përmbaheni suplementeve multivitamine që janë të certifikuara dhe nuk përmbajnë metale të rënda dhe substanca të rrezikshme”, shton ajo./A.ZH-dritare.net
