Prokuroria Speciale e Kosovës merr nën hetim 45 persona për sulmin në Banjë! Mes tyre edhe Radoiçiç!

Prokuroria Speciale e Kosovës njoftoi të mërkurën se ka ngritur aktakuzë ndaj 45 personave në mesin e tyre edhe Millan Radoiçiq për sulmin e armatosur në Banjskë. Të përfshirët, sipas prokurorit të rastit, Naim Abazi, kanë pasur role të ndryshme brenda grupit të tyre kriminal - "duke filuar nga organizimi dhe drejtimi i aktiviteteve terroriste deri te financimi dhe shpëlarja e parave".

"Në mesin e të akuzuarve kryesorë është edhe individi me pozitë kyçe si udhëheqës i grupit, Millan Radoiçiq, i cili ka luajtur rol të rëndësishëm në koordinimin dhe veprimtarinë kriminale", tha Abazi në një konferencë për media, të mbajtur të mëkurën në Prishtinë.

Më 24 shtator të vitit të kaluar, në Banjskë të Zveçanit, pjesa veriore e Kosovës një grup i armatosur serbësh sulmoi policinë e Kosovës, duke vrarë rreshterin Afrim Bunjaku. Në përleshjet e armatosura që pasuan, u vranë edhe tre sulmues serbë. Autoritetet në Kosovë fajësuan udhëheqjen e shtetit serb për organizimin e, siç e cilësuan, sulmit terrorist, por ajo e mohoi përfshirjen. Pesë ditë pas ngjarjes, më 29 shtator, përgjegjësinë për të e mori Radoiçiq, ish-politikan dhe biznesmen nga veriu i Kosovës, i cili besohet se gjendet në Serbi.

Prokuroria e Lartë Publike në Beograd është duke kryer, po ashtu, hetime për rastin.Ajo e ngarkon Radoiçiqin me disa vepra penale që kanë të bëjnë me blerje të paligjshme të armëve dhe “shkaktim të rrezikut të përgjithshëm”. Në deklarimin e fundit që bëri për REL-in, më 15 korrik, kjo prokurori tha se hetimet për rastin “janë duke vazhduar”.

Kush është Radoiçiq?

Millan Radoiçiq ishte nënkryetar i Listës Serbe, partisë më të madhe të serbëve në Kosovë, e cila gëzon mbështetjen e Beogradit zyrtar. Ai dha dorëheqje nga kjo pozitë pak ditë pas sulmit në Banjskë. Prej vitesh, ai është i sanksionuar nga SHBA-ja dhe Britania e Madhe për pjesëmarrje në krim të organizuar ndërkombëtar. Përndryshe, Departamenti amerikan i Shtetit e cilëson atë si kriminel që duhet të mbahet përgjegjës.

Çfarë tha tjetër Prokuroria?

Prokurori Abazi tha se falë bashkëpunimit ndërkombëtar me SHBA-në, shtete të BE-së dhe të tjera, prokuroria ka arritur të sigurojë "prova që ndihmuan në ngritjen e kësaj aktakuze të fuqishme". Ai tha se gjatë procesit të hetimeve "janë sekuestruar dhe konfiskuar prona, automjete të blinduara, para të gatshme dhe llogari bankare, të cilat dyshohet se janë fituar nga aktivitete të paligjshme".

Sipas tij, janë konfiskuar, po ashtu, mbi 1.266 armë dhe pajisje të tjera.

"Ky veprim ka për qëllim të parandalojë përdorimin e këtyre aseteve për aktivitete të mëtejshme kriminale, duke goditur strukturën financiare të këtij grupi kriminal", tha Abazi.

Me kërkesë të Ministrisë së Brendshme të Kosovës, organizata ndërkombëtare e policisë, INTERPOL, lëshoi fletarrestim për Radoiçiqin në fund të vitit të kaluar. Ndërsa ai besohet se është i lirë në Serbi, në Kosovë janë të ndaluar tre persona në lidhje me rastin. Muajin e kaluar, Ministria e Drejtësisë e Kosovës refuzoi kërkesën e Prokurorisë së Lartë Publike në Beograd për informacione në lidhje me rastin Banjska.

Çfarë bëri Serbia?

Presidenti i Serbisë, Aleksandar Vuçiq, tha pas sulmit se Radoiçiq gjendet në “territorin e Serbisë qendrore”. Që atëherë, nuk ka pasur ndonjë informacion zyrtar për vendndodhjen e tij. Prokuroria e Lartë Publike në Beograd tha në tetor të vitit të kaluar se Radoiçiq akuzohet për sigurimin e armëve, municioneve dhe mjeteve shpërthyese me fuqi të madhe shkatërruese nga Tuzlla - qytet në verilindje të Bosnje dhe Hercegovinës - në periudhën nga janari deri më 24 shtator të vitit të kaluar. Ai u akuzua edhe për “shkaktim të rrezikut të përgjithshëm”.

Gjykata e Lartë në Beograd, tetorin e kaluar, e refuzoi kërkesën e Prokurorisë për ndalimin e tij dhe e la të lirë, por ia konfiskoi pasaportën dhe ia ndaloi shkuarjen në Kosovë.

Ndikimi në marrëdhëniet Kosovë-Serbi

Kryeministri i Kosovës, Albin Kurti, e ka kushtëzuar vazhdimin e dialogut për normalizimin e marrëdhënieve me Serbinë me dorëzimin e Radoiçiqit dhe të “grupit të tij paramilitar terrorist” tek autoritetet gjyqësore të Kosovës.

“Për aq kohë sa Radoiçiq dhe grupi i tij janë të lirë dhe të mbrojtur në Serbi, nuk ka mirëbesim në dialogun për normalizim”, tha Kurti më 28 qershor.

Udhëheqja shtetërore në Serbi ka mohuar disa herë se ka gisht në sulmin në Banjskë. Në muajin mars, disa media kanë raportuar se ambasadori i atëhershëm i Serbisë në SHBA, Marko Gjuriq, është takuar me Radoiçiqin, por REL-i nuk ka arritur të përcaktonte vërtetësinë e fotografisë që qarkullonte atëkohë. Komuniteti ndërkombëtar, disa herë, ka bërë thirrje për llogaridhënie dhe ka kërkuar që ata që janë të përfshirë në sulmin në Banjskë, të sillen para drejtësisë./rel