Putin: Sanksionet amerikane janë një akt armiqësor! Do përgjigjemi ashpër
E Enjte 23 Tetor 2025, 19:07
Dritare.net
Presidenti rus Vladimir Putin ka reaguar ashpër ndaj paketës së re të sanksioneve amerikane të shpallura nga presidenti Donald Trump kundër kompanive kryesore të naftës ruse, duke i quajtur ato një akt armiqësor që nuk do të forcojë marrëdhëniet ruso-amerikane.
“Sanksionet e reja të shpallura nga Trump janë një akt armiqësor dhe nuk kontribuojnë në forcimin e marrëdhënieve mes Moskës dhe Uashingtonit,” deklaroi Putin, sipas Cnn.
Duke folur përpara gazetarëve, Putin theksoi se masat e SHBA-së nuk do të kenë ndikim të ndjeshëm mbi ekonominë ruse, duke u shprehur se asnjë vend që e respekton veten nuk vepron kurrë nën presion.
Putin reagoi gjithashtu ndaj diskutimeve për një mundësi që raketa amerikane Tomahawk t’i dorëzohen Kievit. Ai paralajmëroi se çdo përdorim i tyre kundër territorit rus do të marrë një përgjigje të ashpër, në mos tronditëse.
Putin konfirmoi gjithashtu se takimi i planifikuar me Donald Trump në Budapest është propozuar nga SHBA-të, por se presidenti amerikan ka vendosur ta anulojë ose ta shtyjë atë.
“Dialogu është gjithmonë më i mirë se çdo sqarim me forcë apo luftë. Për këtë arsye ne kemi mbështetur gjithmonë vijimin e komunikimit, edhe tani,” theksoi ai./dritare.net
