10 gola në ndeshjen Angli-Francë, thyhet rekordi 44-vjeçar
Sunday 19 July 2026, 09:09
Dritare.net
Ndeshja për vendin e tretë në Kupën e Botës 2026 mes Anglisë dhe Francës do të mbahet mend jo vetëm për spektaklin e jashtëzakonshëm, por edhe sepse hyri në historinë e turneut. Fitorja 6-4 e anglezëve në Miami i dha fund një pritjeje 44-vjeçare, pasi për herë të parë që nga Botërori i vitit 1982 një ndeshje prodhoi të paktën 10 gola.
Përballja nisi si një dominim i plotë i Anglisë, që e mbylli pjesën e parë me rezultatin 4-0. Megjithatë, Franca nuk u dorëzua dhe në pjesën e dytë reagoi fuqishëm, duke e çuar sfidën deri në 5-4 dhe duke rihapur garën për medaljen e bronztë.
Në momentin kur francezët po kërkonin golin e barazimit, Jude Bellingham shënoi golin e gjashtë në kohën shtesë, duke vulosur triumfin e “Tre Luanëve” dhe duke i dhënë fund një prej ndeshjeve më dramatike të parë ndonjëherë në Kupën e Botës.
Me 10 gola të realizuar, Angli-Francë 6-4 u bë vetëm ndeshja e gjashtë në historinë e Botërorit që arrin shifra të tilla. Më parë, vetëm Austria-Zvicra në vitin 1954 (12 gola), Brazili-Polonia në 1938, Hungaria-Gjermania në 1954, Hungaria-El Salvadori në 1982 dhe Franca-Paraguai në 1958 kishin prodhuar të paktën 10 gola.
Kështu, sfida e Miami-t tashmë ka siguruar vendin e saj në librat e historisë si një nga përballjet më spektakolare dhe më të paharrueshme të Kupës së Botës./dritare.net
