Pse qëndrimi në një këmbë është më i rëndësishëm se sa mendoni
E Enjte 15 Janar 2026, 16:04
Dritare.net
Balancimi në një këmbë mund të duket një ushtrim i thjeshtë, por sipas ekspertëve, ai është një tregues i rëndësishëm i shëndetit të përgjithshëm, veçanërisht pas moshës 50 vjeç. Studimet tregojnë se aftësia për të qëndruar në një këmbë për disa sekonda lidhet ngushtë me forcën muskulore, shëndetin e trurit dhe rrezikun e rënieve.
Specialistët shpjegojnë se balanca arrin kulmin në fund të të 30-ave dhe më pas fillon të bjerë me kalimin e viteve, kryesisht për shkak të humbjes graduale të masës muskulore, një proces i njohur si sarkopenia. Kjo humbje ndikon drejtpërdrejt në aftësinë për të ruajtur ekuilibrin dhe rrit rrezikun e dëmtimeve, sidomos te personat mbi 65 vjeç.
Por rëndësia e balancës nuk lidhet vetëm me muskujt. Qëndrimi në një këmbë kërkon bashkërendim mes syve, veshit të brendshëm dhe sistemit nervor, duke e bërë këtë ushtrim edhe një tregues të shëndetit të trurit. Sipas mjekëve, vështirësia në ruajtjen e ekuilibrit mund të sinjalizojë ngadalësim të reaksioneve, probleme në përpunimin e informacionit dhe rrezik më të lartë për rënie.
Studime të fundit kanë zbuluar se personat që nuk arrijnë të qëndrojnë në një këmbë për 10 sekonda kanë një rrezik dukshëm më të lartë vdekjeje të parakohshme në vitet në vijim, ndërsa ata që ruajnë më mirë balancën kanë edhe rënie më të ngadaltë të funksioneve njohëse, përfshirë te pacientët me demencë.
Lajmi i mirë është se balanca mund të përmirësohet. Ekspertët theksojnë se ushtrimet e rregullta në një këmbë ndihmojnë në forcimin e muskujve të këmbëve dhe të ijeve, reduktojnë rrezikun e rënieve dhe përmirësojnë funksionet e trurit, përfshirë kujtesën dhe përqendrimin.
Sipas specialistëve të rehabilitimit, truri mbetet i përshtatshëm për ndryshim edhe në moshë të thyer, dhe ushtrime të thjeshta të balancës mund të kenë ndikim të madh në shëndetin fizik dhe mendor me kalimin e viteve./K.C/dritare.net
