Rama: Hakerat nuk kanë kërkuar 30 milionë€. I bëj thirrje TCH, mjaft me shpifje!
E Mërkurë 20 Korrik 2022, 16:04
Dritare.net
Kryeministri Edi Rama i ka kërkuar Top Channel të mos përhapë panik me lajme të rreme, duke hedhur poshtë lajmin e publikuar nga kjo media, se hakerat që sulmuan portalet qeveritare shqiptare, kanë kërkuar 30 milionë euro.
"Lajmet për një gjobë 30 milionë euro nga hakerat apo për shkatërrimin e të dhënave janë krejt të rreme! Qeveria ka informuar aq sa mund të informojë, në ndërkohë që lufta nuk ka mbaruar dhe pas hakerave qëndron një shtet tjetër, jo një bandë dosido digjitale që merret me gjoba!
Gjyqet me median për shpifje, përfshirë edhe shpifjet që përhapin panik, nuk janë në praktikën e qeverisë sonë! Prandaj i bëj thirrje publike TCH të ndalë menjëherë valën e shpifjeve dhe përhapjen e panikut lidhur me pasojat e agresionit kibernetik mbi Shqipërinë!
AKSHI dhe një skuadër e superspecializuar ekspertësh të huaj,po luftojnë natë e ditë për rimëkëmbjen e plotë në kohë rekord të sistemeve pas zmbrapsjes së sulmit.Eshtë e turpshme që të gënjehet publiku në këtë farë feje,cilatdo qofshin motivet e kësaj vale shpifjesh haluçinante!”, shruan kryeministri Edi Rama./L.F-dritare.net
