Pse yjet e famshëm po lançojnë rrjetet e tyre celulare!
E Mërkurë 18 Qershor 2025, 14:02
Dritare.net
Yjet e famshëm prej kohësh kanë vënë emrin e tyre mbi gjithçka – nga këpucët, kozmetika, deri tek ushqimet e shpejta. Tani, po lidhin markën e tyre edhe me rrjetet celulare.
Trump Mobile, i shpallur të hënën, është shërbimi më i ri celular i lidhur me një figurë të njohur, duke iu bashkuar emrave të tjerë si aktorët Jason Bateman dhe Ryan Reynolds që kanë lançuar shërbime të ngjashme. Operatorët e mëdhenj nuk janë më të vetmit që përfitojnë nga frekuencat që fuqizojnë pajisjet tona. Komedianë, ekipe sportive dhe shitës me pakicë kanë nisur rrjetet e tyre celulare, pasi teknologjia është bërë më e qasshme për kompani jashtë industrisë së telekomit.
Këta ofrues — të njohur si operatorë virtualë të rrjeteve celulare (MVNO) — nuk ndërtojnë rrjete të tyre, por marrin me qira sinjalin nga gjigantët si Verizon, AT&T dhe T-Mobile. Kjo e bën më të lehtë për këdo që të nisë rrjetin e vet, mjafton të blejë kapacitetin e nevojshëm të transmetimit, ndërkohë që vetë kompanitë e mëdha përfitojnë financiarisht nga rrjetet e tyre ekzistuese.
MVNO-t nuk janë të reja — sipërmarrësi Richard Branson themeloi Virgin Mobile në vitin 1999. Por vala e re e MVNO-ve të udhëhequra nga personazhe të famshëm duket se lidhet me disa trende: rënia e besnikërisë ndaj operatorëve tradicionalë, zhvillimi i teknologjisë që lehtëson mbështetjen ndaj klientit dhe faturimin, si dhe përhapja e kartave eSIM, që e bëjnë më të lehtë për përdoruesit të ndërronin operatorët.
“Konsumatorët janë më besnikë ndaj telefonit sesa ndaj operatorit të rrjetit,” thotë Michael Levin, analist në Consumer Intelligence Research Partners. Kjo mund të shpjegojë pse klientët janë të gatshëm të braktisin operatorët tradicionalë për një ofertë të re.
Teknologjia e ka bërë më të thjeshtë ndërrimin, thotë Levin. “Dhe njëkohësisht, konsumatorët u bënë shumë më besnikë ndaj prodhuesve të telefonave. Kështu që operatori nuk është më aq i rëndësishëm.”
Trump Mobile, si MVNO-t e tjerë, pozicionohet si alternativë më e përballueshme ndaj tre operatorëve kryesorë. Për 47.45 dollarë në muaj (plus taksat dhe tarifat), abonentët marrin internet, thirrje dhe mesazhe pa limit, megjithëse shpejtësia e të dhënave ulet pas 20 GB. Gjithashtu përfshihen edhe shërbime mjekësore online dhe ndihmë rrugore.
Donald Trump Jr. deklaroi gjatë lançimit në “Trump Tower” në Nju Jork:
“Një pjesë e madhe e asaj që kemi bërë... është fokusuar në teknologjinë për njerëzit që janë shpesh të nënshërbyer, qoftë në kriptomonedha apo fusha të tjera, por një vend ku ndjemë mungesë performance ishte industria celulare.”
Lançimi i Trump Mobile vjen pas asaj të SmartLess Mobile, një rrjet i ri celular i lançuar nga aktorët Jason Bateman, Will Arnett dhe Sean Hayes, i cili synon të ofrojë plane të lira për përdoruesit që janë zakonisht në Wi-Fi. Aktori i “Deadpool” Ryan Reynolds bleu një pjesë të MVNO-së Mint Mobile në vitin 2019 dhe u bë fytyra e saj, edhe pse T-Mobile e bleu rrjetin për 1.35 miliardë dollarë në vitin 2023.
Pavarësisht dominimit të AT&T, Verizon dhe T-Mobile, ka të dhëna që sugjerojnë se MVNO-të janë në rritje. Sipas Opensignal, MVNO-të vazhdojnë të fitojnë më shumë përdorues që sjellin pajisjet e tyre, ndërkohë që operatorët tradicionalë po humbasin.
Edhe pse planet e MVNO-ve mund të mos jenë gjithmonë më të lira, ato shpesh ofrojnë promocione tërheqëse.
“Shembull: tre muaj për vetëm 15 dollarë në muaj. Më pas, çmimi shkon në 45. Por kur përfundojnë tre muajt, del një ofertë tjetër që ta ul çmimin në 30,” thotë analisti Octavio Garcia nga Forrester.
Ndërsa këto rrjete duken si risi në SHBA, jashtë vendit janë të zakonshme. Për shembull, në Meksikë, rrjeti MVNO i Walmart, i quajtur Bait, ka 19.8 milionë përdorues. Në Itali ekziston një rrjet celular i markuar sipas ekipit të futbollit AC Milan.
Po ashtu, ka një rritje të shërbimeve “MVNO-in-a-box” – kompani që ofrojnë gjithçka të nevojshme për të krijuar një rrjet celular, nga shpërndarja e kartave eSIM, tek akses në rrjet dhe sisteme faturimi. Sipas Juniper Research, të ardhurat globale nga këto shërbime pritet të kalojnë 1 miliardë dollarë deri në vitin 2029.
“Fakti që është bërë më e lehtë të krijosh një MVNO si kompani e vogël tregon për një drejtim të ri të industrisë së telekomunikacionit,” përfundon analisti Runar Bjørhovde./L.F-dritare.net
