Si u hodhën bazat e Lidhjes Bektashiane në vitin 1921
E Shtunë 17 Janar 2026, 16:04
Dritare.net
Më 7 janar 1921, në Teqenë e Prishtës në Skrapar, u mbajt Kongresi i Bektashinjve, një ngjarje me rëndësi të veçantë për historinë fetare dhe kombëtare të Shqipërisë. Kongresi u organizua me nismën e baballarëve bektashianë Ahmet Turhan dhe Hysen Prishta, së bashku me intelektualë shqiptarë, duke u mbështetur në frymën dhe parimet e Statutit të Kongresit të Lushnjës (1920).
Në këtë kuvend morën pjesë përfaqësues të 37 teqeve bektashiane, si dhe simpatizantë të shumtë të këtij komuniteti fetar. Gjatë punimeve, u themelua “Lidhja Bektashiane” dhe u miratua statuti i saj me 28 nene, i cili përcaktonte organizimin dhe veprimtarinë e bektashinjve në Shqipëri.
Kongresi vendosi krijimin e Këshillit të Shenjtë Atnor si organi më i lartë drejtues, i përbërë nga 17 anëtarë. Po ashtu, u morën vendime të rëndësishme për ngritjen e arkës së përgjithshme dhe hapjen e një mësimoreje bektashiane në Teqenë e Sukës, duke i dhënë një shtysë të re arsimit dhe organizimit të brendshëm të komunitetit.
Në vazhdim, gjatë mbledhjes së Përmetit në vitin 1921, Këshilli i Shenjtë Atnor shpalli mëvetësinë (autoqefalinë) e Bektashizmit shqiptar, e cila u njoh zyrtarisht edhe nga Prindi në Turqi. Ky akt shënoi një hap historik drejt pavarësisë shpirtërore dhe institucionale të Bektashizmit në Shqipëri.
