BE heq kufizimet e udhëtimit për Shqipërinë!
E Mërkurë 16 Qershor 2021, 11:11
Dritare.net
Bashkimi Evropian ka hequr kufizimet e udhëtimit për Shqipërinë, Maqedoninë e Veriut dhe Serbinë, pasi tri vendet e Ballkanit kanë marrë statusin e vendeve të sigurta.
Përveç tre vendeve të Ballkanit Perëndimor, në listë janë edhe Shtetet e Bashkuara, Hong Kongu, Makao, Arabia Saudite dhe Tajvani. Pavarësisht vendimit, ndonjë nga shtetet anëtare mund të vazhdojë të kërkojë test negativ për Covid-19 ose një periudhë karantine.
Edhe në rast se disa vende deklarohen të sigurta, secili vend i BE-së ka të drejtë të vendosë masa për të luftuar kovidin.
Për të siguruar statusin e një vendi të sigurt, një shtet duhet të regjistrojë maksimum 75 raste pozitive me koronavirus për 100,000 banorë, në 14 ditët e fundit.
Në muajin maj, Këshilli i BE-së hoqi zyrtarisht kufizimet në udhëtimet jothelbësore për shtetasit e vendeve të treta, të cilët janë vaksinuar me të gjitha dozat e kërkuara të vaksinës kundër koronavirusit. Shtetasit e vendeve të treta përfshijnë edhe qytetarët e Ballkanit Perëndimor./dritare.net
