Si ta kontrolloj varësinë nga telefoni. Këshilla e psikologes Enertila Bekteshi!
E Hënë 20 Janar 2025, 10:10
Dritare.net
Përshëndetje Psikologe Enertila
Unë që ju drejtohem jam një vajzë 28 vjeç e cila po kuptoj se kam shumë varësi nga telefoni im. Ju lutem nëse mund të më thoni diçka për këtë situatë dhe si mund ta kontrolloj veten time. Faleminderit!
Përshëndetje lexues të Dritare.net
Aktualisht, telefonat celularë janë bërë një mjet shumë i dobishëm për jetën tonë të përditshme. Jo vetëm që shërbejnë si një mënyrë për të komunikuar me të tjerët, por mund të na ndihmojnë gjithashtu të organizohemi, si një mjet social, kalendar dhe më shumë. Ndoshta edhe pse këto pajisje mund ta bëjnë jetën tonë më të lehtë, përdorimi i tepërt mund të çojë në varësi afatgjatë.
Shumë njerëz mund të provojnë ankth ose nervozizëm nëse nuk i gjejnë celularët afër. Në fakt, për këta njerëz të qenit pa celularin e tyre mund të bëhet një situatë paniku. Kur dikush është në një situatë pa telefon dhe vuan nga varësia ndaj telefonit, ai mund të ndihet i shqetësuar, nervoz ose të përjetojë simptoma të tjera që mund të përfshijnë pamundësia për të ndarë ose fikur celularin, kontrollin e vazhdueshëm të telefonit për njoftime, mesazhe ose telefonata të reja, mbajtja gjithmonë e telefonit me vete kudo, kontrolli i shpeshtë nëse telefoni është gjithmonë me vete, ndjenja e frikës nga të qenit pa lidhje interneti, mos përfshirja në aktivitetet me të tjerët për të kaluar kohë me celularin.
Përveç simptomave emocionale, njerëzit mund të përjetojnë simptoma fizike për shkak të kësaj varësie , të tilla si frymëmarrje e shpejtë, rritje e rrahjeve të zemrës, djersitje dhe dridhje. Kjo varësi nuk ka ende një arsye specifike për të kuptuar se nga vjen saktësisht.
Të gjithëve na kushton të shkëputemi nga pajisjet tona celulare . Megjithatë, kur
kjo situatë kthehet vërtet në problem në këndvështrimin tim do tu sugjeroja të vendosin kufij në përdorimin e telefonit. Ka aplikacione që lejojnë të kontrolloni kohën kur përdorni pajisjen. Ndaloni përdorimin e tij gjatë vakteve ose kur shkoni në tualet.
E dashur lexuesja jonë jepni përparësi kontaktit ballë për ballë . Është shumë e lehtë në ditët e sotme të zëvendësohet plotësisht kontakti njerëzor me atë nëpërmjet telefonit. Pra, përpiquni të takoni miq personalisht dhe të kaloni kohë duke bërë aktivitete që nuk kërkojnë përdorimin e kësaj pajisjeje. Mënyra më e mirë për të lënë telefonin tuaj pas është të gjeni kohë cilësore për hobi ose argëtime të tjera.
Aktivitete si leximi, piktura ose vizatimi mund t'jundihmojnë të shpërqendroheni dhe të jeni më të lidhur me veten dhe momentin aktual. Lexuesja jonë filloni të kujdeseni për veten. Përqendrohuni në kujdesin për veten, qoftë duke u ushtruar më shumë ose duke i dhënë më shumë kohë vetes. Kjo do t'ju ndihmojë gjithashtu të lini celularin tuaj mënjanë. Varësia nga telefoni është një problem gjithnjë e më i pranishëm sot. Për më tepër, për shkak se është një mjet i përdorur gjerësisht, shumë njerëz mund të kenë një varësi dhe të mos e kuptojnë atë. Shpresoj shumë që këndvështrimi im t’u ndihmojë sadopak në situatën tuaj. Gjithë të mirat!/dritare.net
