Kurti pranon të heqë policinë nga Veriu dhe të mbajë zgjedhje të reja në Veri!
E Martë 11 Korrik 2023, 22:10
Dritare.net
Kryeministri i Kosovës ka rënë dakord me kushtet e Bashkimit Evropian për tërheqjen e policisë nga Veriu dhe mbajtjen e zgjedhjeve të reja në 4 komunat.
Qeveria e Kosovës ka njoftuar se në takimin që kryenegociatori i Kosovës në dialogun me Serbinë, Besnik Bislimi ka zhvilluar të hënën me emisarin e BE-së për dialogun, Miroslav Lajçak, Kosova është pajtuar që menjëherë të zvogëlojë praninë policore përreth ndërtesave komunale në veri, në masën 25%.
Një pikë tjetër është ajo për mbajtjen e zgjedhjeve në katër komunat në veri.
“Qeveria e Kosovës përmes një deklarate publike mbështet mbajtjen e zgjedhjeve të parakohshme në 4 komunat në veri të vendit dhe atë pas stinës së verës. Kosova shpreh përkushtimin për sigurimin e bazës së nevojshme ligjore për të mundësuar organizimin e këtyre zgjedhjeve”, thuhet në këtë pikë.
Në pikën e katërt të listuar nga Qeveria, thuhet se BE-ja do ftojë dy kryenegociatorët në Bruksel me synim finalizimin e planit të sekuencimit për Marrëveshjen drejt normalizimit, pas të cilit theksohet se do të fillojë zbatimi i të gjitha neneve të marrëveshjes. Veprimet e sipërpërmendura thuhet se do të finalizohen brenda një periudhe dyjavore./L.F-dritare.net
