Për heroin e opozitës, Admir Murataj

Nga Mero Baze

Ka një shqetësim të fortë nga opozita për vrasjen e organizatorit të tri grabitjeve në Rinas. Shqetësimi është shfaqur qysh në minutat e para pas vrasjes, kur në debatet televizive, të dërguarit e opozitës ishin gati në një gjendje histerike, për të kuptuar kush e vrau organizatorin. Disa prej tyre kërkonin verifikim të armëve të policëve që qëlluan, ekzaminim balistik të tyre dhe detaje të tjera hetimore, që të linin të kuptoje se donin ta kapnin patjetër atë “kriminel” që vrau Admir Muratajn.

Policia për fat, ruajti qetësinë dhe nuk reagoi ndaj kësaj histerie, edhe pse në çdo vend normal të botës, të bësh një shantazh të tillë mbi forcat e ndërhyrjes së shpejtë, në një situatë kriminale, është vepër penale.

Për orë të tëra policia po trajtohej si kriminele dhe viktima si hero, që i duhej gjetur vrasësi.

Kjo natyrisht ka shtuar sikletin tek ata oficerë policie që kanë gjuajtur, pasi në traditën e shpifur të policisë shqiptare, dekonspirimi është shpesh shkak për demoralizim të policisë dhe asgjesim të forcës goditëse të saj.

Por pak nga pak, skenari ndryshoi. Për faktin se policia filloi të fitonte pikë, pasi u gjend tre minuta pas alarmit në vendngjarje dhe hapi zjarr mbi kriminelët, duke u rrezikuar nga granatat dhe qitja me armë e tyre, u kalua në skenarin B.

Tani prej dy ditësh, opozita po flet për autorë të tjerë sekret të vrasjes së Muratajt. Kjo, për ta thelluar problemin dhe për ta bërë policinë vjedhëse të parave, kurse Admirin thuajse ëngjëll mbrojtës të tyre.

Marrëzia ka shkuar në ekstrem, duke i dhënë liri fantazisë, deri tek fakti që qeveria ka vjedhur lekët dhe në fund ka vrarë nja djalë të pafajshëm nga Tropoja, që qenka mbështetës i PD, që njihet me gjithë rrethin familjar të Sali Berishës dhe që një rapsode tropojane po i bën dhe këngë.

Përfytyroni tani të çmendet dhe qeveria dhe të thotë që meqëse gjithë tropojanët e PD e kanë mik këtë viktimën, paratë i ka vjedhur Berisha, për të financuar revolucionin, dhe duhet të ketë gisht dhe në dy rastet e tjera.

LEXO DHE :  Ide si të kombinoni xhaketat xhins, në pranverë dhe verë!

Kjo papërgjegjshmëri në interpretimin e asaj që ndodhi, në fakt e ka burimin tek dy halle të mëdha që ka opozita.

I pari, është që po iu dhimbset i vrari, se e kanë të tyrin. Me sa duket kanë pasur shpresa të mos kapej kurrë, por ja që u vra.

E dyta, që është dhe më konkrete, ka të bëjë me datën 13 prill.

Opozita mori një goditje të fortë nga faktori ndërkombëtar dy ditë më parë. I dërguari më i rëndësishëm i SHBA në Tiranë, abandonoi shpresat e PD për revolucionin e saj, dhe mbështeti deputetët e rinj që shkuan në Kuvend, duke theksuar se Qeveria dhe Parlamenti janë legjitimë, dhe në zgjedhje do shkohet në vitin 2021. Të njëjtin qëndrim përsëriti menjëherë dhe Bashkimi Europian.

Kështu, prej të hënës e deri më sot, kur opozita është në orët e saj më të zeza, i vetmi aleat i saj i qëndrueshëm për të zhurmuar fatkeqësinë e saj, mbetet Admir Murataj.

Ai është shpresa që militantët të mos përsërisin me vete dhe njëri- tjetrin, që janë të braktisur nga Perëndimi dhe revolucioni i tyre nuk ka më asnjë shpresë. Biles dhe një shok i Lulit që shiste kokainë, u arrestua sot.

Shpresa e vetme e tyre mbetet Admir Murataj. Edhe pse i vdekur, ai u duhet deri nesër në mbrëmje, që demokratët të mos kenë kohë të reflektojnë për budallallëkun e radhës.

Prej tre ditësh Admir Murataj është heroi i tyre, njeriu që duhet nderuar dhe mëshiruar, njeriu që i duhet hetuar vdekja, jo jeta prej gangsteri, njeriu që e njihnin të gjithë dhe me sa duket, e kishin një prej shpresave.

Nuk di si ai ka ndihmuar i gjallë, por i vdekur duket se po u duhet më shumë. Sidomos kur mendojnë se ai mund ta mbajë nesër zhurmën për vdekjen e tij.

Problemi është nesër në mbrëmje, kur në Bulevard të ketë më pak njerëz, më pak shpresë dhe natyrisht, Shqipëria një kriminel më pak. Heroi i tyre nuk i ndihmon dot gjatë. Se veten se ndihmoi dot këtë radhë./ TemA

PËRGJIGJU

Please enter your comment!
Please enter your name here

This site uses Akismet to reduce spam. Learn how your comment data is processed.