Vrasje makabër në Fieri/ Autori: Isha i dehur
Dritare.net
Albert Zekaj, 32 vjeç me banim në Kalldrun, bashkia Koplik, Malësi e Madhe, pasi u mor në pyetje pranoi autorësinë e vrasjes dhe hedhjen e kufomës në vendin ku u gjet.
Ngjarja e rëndë ka ndodhur para një viti. Sipas policisë, “ky shtetas ka qenë shok me viktimën K.B, ku janë njohur para tre vjetësh në Belgjikë dhe më pas kanë qëndruar në shtëpi me qira në qytetin e Fierit. Më datë 22.06.2017 rreth orës 23:00 ky shtetas dyshohet se e ka vrarë ne sende të forta dhe trupin e ka hedhur në afërsi të fshatit Daullas”.
Albert Zekaj u arrestua si autor i dyshuar i vrasjes së shtetasit Kreshnik Beqiraj, 36 vjeç, banues në Fier.
Sipas dëshmisë së tij para hetuesve Zekaj është shprehur se “ishte i dehur kur e vrau Kreshnikun, kur e kuptova që kishte vdekur, e groposa”.
Viktima ishte denoncuar në polici i humbur nga familjarët, por nga veprimet e kryera si dhe nga dyshimet e familjarëve, në muajin janar 2018, Drejtoria Vendore e Policisë Fier ka nisur hetimet pasi dyshohej se ky shtetas mund të ishte vrarë ose rrëmbyer.
Nga kryerja e veprimeve proceduriale u sekuestruan në cilësinë e provës materiale:
– një batanije e cila kishte shërbyer për transportin e trupit.
– një çekiç me të cilin autori ka kryer krimin;
– mbetje të trupit të cilat u dërguan pranë Institutit të Mjekësisë Ligjore Tiranë, për ekzaminim të mëtejshëm./News24/