Shqiptarët festojnë sot 29 Nëntorin, ditën që shënon 81-vjetorin e Çlirimit të vendit nga pushtuesit nazifashistë. Kjo datë historike kujton përfundimin e Luftës Nacionalçlirimtare dhe sakrificën e mijëra shqiptarëve që luftuan për liri dhe dinjitet kombëtar.
Si çdo vit, autoritetet më të larta të shtetit pritet të zhvillojnë homazhe në Varrezat e Dëshmorëve të Kombit, duke nderuar kontributin e dëshmorëve dhe të gjithë atyre që morën pjesë në rezistencën antifashiste. Përveç ceremonive zyrtare, në të gjithë vendin janë parashikuar një sërë aktivitetesh përkujtimore dhe festive.
Institucionet kulturore kanë përgatitur një program të pasur me aktivitete që përfshijnë koncerte, ekspozita, recitime, valle dhe aktivitete artistike, duke ofruar një mundësi të veçantë për të përjetuar historinë, kulturën dhe traditat shqiptare në këtë ditë të shënuar.
29 Nëntori mbetet një moment i rëndësishëm reflektimi dhe uniteti kombëtar, duke rikujtuar detyrën e çdo qytetari për të mbrojtur vlerat dhe lirinë e vendit./K.C/dritare.net
