Si u shpëtua biblioteka e Laprakës në 97-ën!
E Shtunë 29 Nëntor 2025, 15:03
Dritare.net
Viti 1997 mbetet një njollë e errët në historinë e Shqipërisë, një kohë kur shteti ra dhe kaosi mori kontrollin. Institucionet u dogjën, arkivat u shkatërruan, dhe trashëgimia kulturore u vu në rrezik. Por në mes të kësaj anarkie, kishte njerëz të thjeshtë që bënë akte të jashtëzakonshme. Një histori e tillë, e treguar nga gazetarja Luela Myftari, zbulon se si banorët e Laprakës shpëtuan bibliotekën e lagjes së tyre nga flakët.
Luela kujton se si, kur ishte fëmijë, biblioteka e Laprakës u përfshi nga zjarri. Në mungesë të zjarrfikësve dhe shtetit, bibliotekarja e lagjes, e njohur si 'Teta Goni', bëri një veprim të guximshëm. Ajo vrapoi derë më derë te familjet që i njihte si lexues të rregullt, duke u kërkuar ndihmë për të shpëtuar librat. Përgjigja e komunitetit ishte prekëse. Prindërit e Luelës, së bashku me fqinjët e tjerë, zbrazën thasët e miellit dhe patateve ushqimet bazë për mbijetesë në atë kohë krize dhe vrapuan drejt bibliotekës.
'Im atë dhe ime më boshatisën thasët e rezervave ushqimore dhe i mbushën me libra,' tregon Luela. Ishte një skenë sa tragjike aq edhe shpresëdhënëse: njerëz që në mes të plumbave dhe zjarrit, zgjodhën të shpëtonin librat. Ata i transportuan librat në shtëpitë e tyre, duke krijuar kështu biblioteka të improvizuara që mbijetuan. Luela përshkruan me humor dhe nostalgji momentin kur u hapën thasët në shtëpi: babai kishte marrë veprat e Enver Hoxhës dhe letërsi ruse, ndërsa nëna kishte shpëtuar klasikët perëndimorë si Remark dhe Hemingway. Këta libra, me vulat e bibliotekës së djegur, qëndrojnë sot në raftet e shtëpisë së saj si dëshmi e një kohe kur kultura u mbrojt nga vetë qytetarët, kur institucionet dështuan./E.P-dritare.net
