Çfarë vjen pas zgjedhjes së asamblesë

Nga Dritan Hila

Nëse diçka do të mbahet mend nga ky Kongres i socialistëve, do të jenë rezultatet e votimeve 3:1497 dhe 6:1494. Kush ka qeshur me rezultatet e kongreseve të Sali Berishës, është koha të qeshë prapë. Po i afrohen rezultateve të Komandantit.
Deri në asamblenë e fundit, Edi Rama për shkak të qënies në opozitë, ishte i detyruar të afronte në parti dhe forumet drejtuese të saj edhe njerëz me personalitet dhe të njohur në publik, të nevojshëm në kohën e opozitës, për të krijuar një velo intelektualizmi dhe gjithëpërfshirje. Asambleja e re, pasqyron vizionin e Ramës për partinë. Në rradhët e saj, emëruesi i përbashkët është besnikëria. Shumë prej tyre janë emra të panjohur, jo vetëm për publikun por edhe për partinë. Gramoz Ruçi dhe Pandeli Majko, e ndihmuan t’i japë dorën e fundit. Janë nga garda e vjetër. Tani janë krejtësisht në darën e Ramës i cili mund t’i ekzekutojë në çdo moment, me dorën e buratinit të tij Taulan Balla. Por nuk do të jetë e nevojshme.
Do të jetë kuriozitet qëndrimi që do të mbajë Blushi dhe ndjekësit e tij. Nëse mendojnë të vendosin shishen në rradhë, derisa Rama të humbasë dhe dorëzojë partinë, nuk funksionon. Rama është shumë i ri dhe shumë i korruptuar, për të dalë në pension pa mbrojtje politike. Ndoshta mendojnë se mund t’ia marrin me puç brenda partisë. Pak e vështirë duke parë se deri më sot, Rama është i pa konkurueshëm në intrigë.
Por ajo që intereson është e ardhmja e vendit. Në këtë kuadër politik, ata që bëjnë diferencën janë Berisha, Meta dhe Rama. I pari, nuk është më aktiv. Meta, është më racional, dhe i vetëdijshëm për forcën që ka, e di se nuk mundet të bëjë diferencën, por vetëm të mbijetojë. Ramës i vetmi rrezik që i kanoset, është një shizmë nga rradhët e tij. Ajo mund t’i rrudhte numrin e deputetëve. Dhe normalisht kundërshtarët e tij, tashmë nëse duan ta thyejnë, duhet të bazohen tek vota e sovranit. Ramës nuk i imponohen dot me debat brenda partisë. Ai e kontrollon atë. Mund t’i imponohen duke krijuar një parti të re e cila me numrin e deputetëve që do të marrë në parlament, do ta detyrojë të negociojë. Dhe dihet që nuk ka burrë më të egër me të dobëtit (siç e tregoi kongresi, apo sjellja me partitë aleate); dhe burrë më të epshëm me të fortit (siç është me Metën dhe dikur me Berishën). Tashmë Edi Ramën, ashtu si Berishën dikur, mund ta ndalë vetëm sovrani në revanin e tij. Këtë duhet ta kuptojnë kundërshtarët e tij. Përndryshe vitrina e muzeut të politikanëve në pension, ka plot vende bosh.

PËRGJIGJU

Please enter your comment!
Please enter your name here

This site uses Akismet to reduce spam. Learn how your comment data is processed.