U zumë për pijen/ Rrëfehet polici që qëlloi dajën dhe shokun
Dritare.net
Grupi Hetimor ka zbardhur dëshminë e policit e cili pohon se ka qëlluar dajën dhe shokun e përbashkët, pasi i kërkuan llogari se pse ishte i dehur që në mëngjes.
“Isha në gjendje të dehur sepse kisha konsumuar disa gota alkool. Në këtë moment në lokal vjen daja dhe Genci (Genc Goga). U ulën përballë meje dhe më pyetën se ku isha apo pse ndodhesha aty. Daja nisi të më qortonte, madje më kërkonte llogari pse isha dehur në pikë të mëngjesit. Unë kisha pirë vetëm disa gota pasi isha kthyer nga puna. Nuk e durova dot faktin se po më qortonte në sy të një personi të tretë, me të cilin nuk kishim lidhje familjare.
Këto janë muhabete shtëpie. Këtë nuk e përtypa dot, ndaj u acarova dhe pa u menduar gjatë, ndoshta i shtyrë edhe nga pija, qëllova në drejtim të dajës për ta trembur. Ndërkohë Genci u përpoq të më ulte armën poshtë, por unë e shkreha dhe qëllova. Aty mbeti i plagosur në dorë Genci dhe plumbi preku edhe dajën. Më pas u tremba dhe u largova me shpejtësi nga vend i ngjarjes.
Nuk dija çfarë të bëja, pasi isha në gjendje të dehur e nuk logjikova”, ka thënë 36-vjeçari para grupit hetimor. Ai ka shprehur pendesë para hetuesve. “U kërkoj ndjesë të dyve, dajës dhe Gencit. Nuk kisha për qëllim t’i qëlloja, por në pije e sipër dhe pa logjikuar mirë veprova në mënyrë të gabuar. Kërkoj ndjesë”, ka deklaruar autori, i cili ishte i punësuar si polic në burgun e Zaharisë./ dritare.net