Harrova ç’kisha ngrënë më parë. Harrova edhe emrat e shefave të tjerë. Ky ishte efekti që shkaktoi një darkë e përgatitur nga Shef Genti Malaveci. Kur unë e kam njohur Gentin ai eksperimentonte me kuzhinën molekulare. Më tregonte pjata që nxirrnin tym apo shkumëzonin, të lehta e aromatike, por që shumë prej nesh i përcillnin me skepticizëm. Pas disa vitesh ne u ritakuam në Hotel Flower, ku Genti më njohu me një tjetër lloj gatimi, më afër atij konvencional. Nuk i vë dot një emër, epitet a krahasim. Sepse jam e bindur që s’do i jepja hakun që i takon. Di vetëm të them se darka që hëngra në Golem para ca ditësh, do mbahet mend gjatë për prezantimin, elegancën, shijen, teknikat e përdorura, për kënaqësinë e syrit, por edhe të stomakut.
Vetëm disa restorante (që numërohen me gishtat e dorës) në Tiranë, mund t’i afrohen për cilësi, kuzhinës së Shef Gentit. Përtej stilit të gatimit këto restorante dallojnë nga Flower për faktin se prej tyre del disi i lehtë nga portofoli, por edhe nga stomaku. Është e rëndësishme t’u rrëfej se Genti nxjerr art prej duarve të tij, por jo nga ai i restoranteve që të ofrojnë pjata me një shkop, 2 fije bari e 3 pika ngjyrash.
E kuptova se do të ishte një darkë e veçantë, që kur provova sallatën me një dressing të athët e të ëmbël që nxirrte në pah freskinë dhe aromën e barishteve të përzgjedhura. Pjata që pasoi ishte “Ceviche”; fileto levreku e marinuar me frut pasioni, lime, lëng domatesh dhe 12 lloj erëzash. Sa herë fusje pirunin në gojë, ndjeje një aromë të ndryshme. Kjo është padyshim pjata ime e preferuar. Por nëse do vendosnit të shkonit në Flower, do ju sugjeroja edhe fileton e kocës me luspa kungulli, me krem “Ajo Blanco”, panxhar të pjekur dhe dollmë me lakër kineze që mbështjell tartar peshku me salcë avokado. Kjo pjatë me shije delikate, lidhte 2 nuanca, peshkun e ngrohtë me kremin e bajameve dhe peshkun e ftohtë, të marinuar. Dy pjatat që preferova unë, ishin frymëzuar nga kuzhina latine, e Perusë dhe Spanjës, por ju mund te zgjidhni atë që i përshtatet më mirë qiellzës tuaj.
Në “Flower” Genti sapo kishte sjellë menunë e re dimërore. Them sjellë, sepse Genti është një shef në lëvizje, ose siç më pëlqen t’i them unë “shef me korrespondencë”. Pjesën më të madhe të vitit ai e kalon në Athinë, ku ka familjen si dhe ku drejton 2 restorante. Herë pas here ai vjen në Shqipëri, kur administratorët e restoranteve e thërrasin për t’u ndërtuar menunë ose për të kontrolluar që askush nuk ka devijuar nga recetat që Genti ua ka besuar më parë. Gjatë verës Genti drejtonte kuzhinën e një hoteli në Sarandë, por mu bë shumë qejfi që Olti dhe Jola, administratorët e Flower, vendosën t’i besonin kuzhinën e hotelit të tyre dhe tashmë shef Gentin e kam kaq pranë Tiranës.
I nxitur nga stili i restoranteve greke të cilat u sprovuan nga kriza ekonomike, Genti më tha se ishte i vendosur të sillte risi, me teknika të mira, nivel të lartë, sasi, por me pak lekë.
Dhe sa mirë që është kështu, se përndryshe si do ja bëja pa riprovuar të paktën ëmbëlsirat e mia të preferuara cheesecake me reçel ftoi, byrekun me qumësht dhe specialen që nuk e gjeni tjetërkund, ëmbësirën "snikers", me krem kikirikësh e petë farash susami.
S'di ç'të them tjetër, sepse edhe vetë Shefi fliste vetëm me punë dhe shikime modeste e falënderuese, ndërkohë që ne hanim.
Ju mbetet vetëm të shkoni dhe të hyni në histori, si ata që shkuan, e provuan dhe u rikthyen nga parajsa.
Ju bëftë mirë me Gentin!/dritare.net