A do jetë fati i Lalit, si fati i katundarëve që përzë (dhe bën mirë)

Nga Dritan Hila
Lajmi rutinë i përzënies të disa shitësve abuzivë nga ambjentet publike nga policia bashkiake ka ngjallur një furtunë mediatike e cila si nis, ashtu edhe shuhet. Është një betejë që nuk e dëmton Veliajn, pasi për çdo fshatar abuziv të hequr nga rruga, janë dy shitës legalë perimesh që gëzohen nga eleminimi konkurencës së pandershme dhe katër banorë që i bezdis kaosi që krijojnë.
Nuk i prishin punë Veliajt, protestuesit profesionistë të rrjetit të cilët për të qenë të drejtë kanë formim civil dhe profesional të shëndoshë, por janë parapolitikë në objektivat e tyre dhe pa një platformë. Aq më pak protestat për zhdukjen e qenve endacakë apo masa e ordinerëve që fjalori u kufizohet në tre lidhëza dhe organet gjenetale.
Por, po fillon viti i fundit i qeverisjes së Veliajt dhe është koha të bëhet një bilanc i tij.
Veliaj është nga njerëzit që i ka mëshuar shumë imazhit. Vështirë të ketë bërë aq punë sa ka thënë, por makina e tij e propagandës ka qenë efiçente. Shumë nga aksionet e tij kanë qenë pa impakt, por të tjerat kanë qenë të prekshme.
Parku i fëmijëve i liqenit ishte një fjasko, por përfundimi i unazës që e rrethon liqenin është evident dhe mbresëlënës; Rregullimi i cepave të trotuarëve që paraqiteshin, sikur bënte digën e Fierzës ishin për të mbushur edicionet ditore te lajmeve, por rikualifikimi i disa segmenteve si Komuna e Parisit, Pazari i Ri, apo segmentëve të tjerë i kanë rritur pikë. Tirana nuk është betonuar aq sa e akuzojnë kundërshtarët, ende jo, por nëse gjysma e akuzave është e vërtetë atëhere ka përgatitur një masakër urbane.
Për këtë Edi Rama është bashkëfajtor, në mos ai më kryesori.
Por cila do të jetë e ardhmja e tij politike e Erion Veliajt?
Fillimet e tij si ministër që vraponte me fëmijë romë në krahë kaluan shpejt dhe ai u përball me çështjet reale. Por ministria ishte vetëm një trampolinë. Synimi i tij ishte bashkia, në mënyrë që të imitonte edhe trasenë e Ramës.
Veliaj u përpoq të ishte djali i mirë në konkurencën me Tahirin. Sektori delikat, ku operonte konkurenti i tij, ia hëngri kokën vetë.
Në ujëra të qeta, lundrimi i tij drejt rikandidimit duhej të ishte i sigurtë, por ngjan se bathët nuk janë mirë për kryetarin e bashkisë. Pushteti i grumbulluar për shkak të funksionit, interesat që ndërthuren, e kanë fuqizuar. Dhe nëse Rama humbet në vitin 2021, Veliaj bëhet konkurent serioz për kryesinë e PS. Por Rama është ende i ri për të dalë në pension.
Ndaj ngjan se Veliaj nuk është më i preferuari i tij. A do të jetë ai kandidati i vitit 2019 mbetet për t’u parë. Sulme të cilat i vijnë nga segmentë të Ramës, potencimi i tyre apo aleancat edhe për çështje banale si kjo e shitësve abuzivë, tregojnë se Lali nuk i ka mirë punët.
A do të zgjedhë ai një përplasje me Ramën? Ka shumë të ngjarë se jo. Tashmë edhe Veliaj e ka pësuar konsumin e tij nga pushteti. Ai ka pasur një makinë efiçente propagande, por edhe kundërshtarët e tij kanë qenë jo më pak efektivë dhe të shumtë, madje duke harruar herë me qëllim dhe herë pa, se problemi kryesor i tyre ishte Rama. Historia dhe politika nuk kanë vijë llogjike.
Ndërkohë edhe në mos marrtë miratimin e Ramës për rikandidim, Lali si tiranas i adoptuar do të presë, Koha shëron shumë plagë dhe mbyll shumë probleme. Ku i dihet? Një ditë mund të lindë nevoja edhe një herë për të. Sidomos në një treg si ai politik, ku prodhimet ose janë të kalbura ose të infektuara. Si produktet e shitësve abuzivë./dritare.net

LEXO DHE :  Rama: Spitalet krahasuar me pesë vite më parë, si dita me natën

PËRGJIGJU

Please enter your comment!
Please enter your name here

This site uses Akismet to reduce spam. Learn how your comment data is processed.